لا تــــقولين لطفلك ,,,, بل قولي له ..

اهلين فيكم شخباركم
لا تقولين ياويلك إن رجعت البيت وملابسك وسخة
- قولي ما أجملك يوم ترجع البيت وملابسك نظيفة


لا تقولين الله ياخذك ... والا ياليت يوم ولدتك بركت عليك
- قولي الحمد لله إللي وهبك لي هدية


لا تقولين بسير أرقد وما أبغي أسمع صوتك
- قولي أنا أدري الحلو مابيخلي أحد يسوي إزعاج علشان الماما محتاجة ترقد وترتاح


لا تقولين أف ذبحتني بشقاوتك ... إياني وإياك تكسر أغراض البيت - قولي الحمد لله إن الله رزقني بولد مثلك يحافظ على أغراض البيت ومنظره علشان الناس يوم تدخل ... تقول ما شاء الله على الولد إللي يحافظ على نظافة بيته.



لا تقولين قوم ذاكر وحل واجباتك
- قولي شو رايك تذاكر علشان نقعد مع بعض نلعب ونسولف بدون ما نحاتي واجباتنا


لا تقولين إنت غبي أو إنت عبيط أو إنت ماتفهم ... راعي قدرات الطفل للإستيعاب
- قولي ماما خلنا نعود أنفسنا نفكر ونركز قبل ما نسوي أي شي أو نقول شي ( لاحظي صيغة الجمع ... علشان الطفل مايحس إنه استيعابه بطيء وهذا عيب يخصه بروحة فينطوي على نفسه )


لا تقولين إنت عنيد وما يفيد فيك غير الضرب
- قولي ما شاء الله عندي ولد يحبني ويسمع كلامي فيستاهل إني أسمع كلامه ... فشو تحب تاكل اليوم أو وين تحب تسير في نهاية الإسبوع أو شو الهدية إللي تبغيها أو تستاهل بوسه كبيرة أو تستاهل ضمة قوية علشان ما يتعود الطفل على الجزاء المادي


لا تقولين عمرك ما بتصير مثل فلان ... أو الله عطى الناس عيال وعطاني أنا ولد مثلك خايب
- قولي أحبك يوم تسوي أشياء تشرف علشان أفتخر فيك قدام الناس يتمنون عيالهم يكونون مثلك


لا تقولين إنت مامنك فايدة في الدراسة أو بذبحك إن جبت لي درجات واطية
- قولي أنا واثقة إنك ما بتخيب ظني فيك ... وما بتجيب غير الدرجات الحلوة إللي مثلك


لا تقولين كل أكلك وماأبغي أشوف شي في صحنك
- قولي خلنا نشوف من الأشطر أنا والا إنت منو إللي بيقدر يخلص إللي في الصحن
( لا تحاولين تترسين الصحن فوق طاقة ولدج علشان ما يحط في خاطره إنه ماخلص صحنه وخسر )
( لا تقولين لولدج خلنا نتسابق والا منو يخلص قبل الصحن .... علشان ما ياكل بسرعة فتتعب معدته لأنه ما يقدر يهضم بسرعة أو يغص إسم الله عليه )

لا تقولين لطفلك يا **** أو يا حقير (
لأنج قدوة ... فلازم تراعين ألفاضج وبالذات إنج أم واعية وفاهمه ما شاء الله عليج )

مع تحياتي للجميع

تسلم ايدك الحلوه خيوه
تحياتي مزيانه

دموع القم، المزيونة، مزيانة
مشكورين يالغالين على التواصل المستمر

وتحيتي للجميع

no0ono0o
مشكورة على الطلة الحلوة عيني


وتحيتي لكم